Bòkadosc didakticzny wiédzë a edukacjowëch czekawinków dobëlë szkólny kaszëbsczégò jãzëka we wtórk 23 séwnika na Filologicznym Wëdzélu Gduńsczégò Ùniwersytetu òbczas metodiczny kònferencje pòd titlã „Pò kaszëbskù bënë i bùten! Sztuka żywego słowa na lekcjach języka kaszubskiego”. Wëdarzenié bëło przërëchtowóné przez Kaszëbskò-Pòmòrsczé Zrzeszenié i Gduńsczi Ùniwersytet we współdzejanim z Pòmòrsczim Centrum Edukacje Szkólnëch.
Naùczëcelczi a naùczëcele wëfùlowalë jedną z aùlów gduńsczi ùczbòwni, gdze na zôczątk sztudéra kaszëbsczi etnofilologii, Kacper Kamińsczi, òpòwiôdôł ò baro czekawim projekce przërëchtowónym przez niegò razã z drëszkama z rokù w òbrëmim zajmów na kaszëbsczim czerënkù. Gôdka tuwò ò Kaszëbsczim Pòeticczim Slamie, jaczi òstôł baro bëlno przëjãti bez kaszëbską spòlëznã, ò czim mòże swiôdczëc fùl zala òb czas dwùch donëchczasnëch edicjów rozegracje, a téż lëczba lëdzy zgłoszonëch do wiérztowëch miónków. Zarô pòtemù na binie pòjawiła sã Ana Dunst, direktórka wëdôwiznë Kaszëbskò-Pòmòrsczégò Zrzeszeniô, jakô rzekła ò nônowszich pùblikacjach òsoblëwie brëkòwnëch szkólnym kaszëbsczégò jãzëka na nowi szkòłowi rok.
Równo ò pół dzesąti do pôłniô òrganizatorzë rëgnãlë z ùroczëstim òtemkniãcym kònferencje. Pòzeszłëch pòwitalë wiceprzédniczka KPZ, Bòżena Ùgòwskô, przédniczka pòmòrsczégò òkrãgù Zrzëszë Pòlsczégò Naùczëcelstwa (ZPN), Elżbiéta Markòwskô, pełnomòcniczka rektora GÙ ds. regionalny pòliticzi, Alina Swebòckô, przedstôwcka direktora Pòmòrsczégò Centrum Edukacje Szkólnëch, Dóminika Ringwelskô, a direktórka Institutu Kònfùcjusza GÙ, prof. Aneta Lewińskô. Zôczątk béł téż leżnoscą do achtniãcô bez przédniczkã pòmòrsczégò òkrãgù ZPN latosy dobëtnicë nôdgrodë „Bëlny Szkólny”, Elżbiétë Bùgajny, a wëapartnionëch: Emilie Maszczi a Marzenë Bòrzëszkòwsczi. Te trzë białczi òtrzimałë sertné gratulacje za swòjã robòtã na rzecz rozwiju miłotë do kaszëbiznë westrzód młodëch lëdzy, a téż ksążkòwé nôdgrodë.
Lucyna Radzymińskô a Justina Pòmierskô, jaczé tradicyjno prowadzëłë no edukacjowé wëdarzenié, rôczëłë na binã pòsobicą pòstãpnëch prelegentów. Pierszą bëła Éwa Andrzejewskô, didaktik a aùtórka lëcznëch artiklów i pùblikacjów tikającëch sã nôùczi a ùczeniô cëzëch jãzëków, chtërna klarowała pòdéńdzenié do rozwijaniô spòsobnoscë gôdaniô na spòdlim nowi programòwi pòdstawë. Dała bôczënk na znaczenié interakcje w sztôłcenim gôdaniô, pòdała przikładë mediacje w kòmùnikacje a téż pòkaza, jak planowac ùczbë w zadaniowim pòdejscu. Zofiô Pòmirskô w swòjim wëstąpieniu zagwësniwała, że òbcowanié z żëwim słowã pòmògô w rozwiju szacënkù do regionu i lokalny kùlturë, a téż w bùdowanim łączbë midzë szkòlôkama a jich spòdkôwizną.
Po kawòwi/kùchòwi paùze, òbczas jaczi gòsce mielë leżnosc zakùpic kaszëbsczé pùblikacje przë stanowiszczu naji wëdôwiznë, żdałë na naju pòstãpné baro czekawé warkòwnie. Danuta Stanulewicz prezentowa wëniczi swòjich badérowaniów, gdze pòdczorchiwała znaczënk kaszëbsczich mùzycznëch karnów w rozkòscérzanim krézu ùżëtkòwników kaszëbsczégò jãzëka. Ana Dąbrowskô przedstawiła bëlny ôrt prowadzeniô zajmów dlô dzecy za pòmòcą zôbawczi Bee-Bot, jaką mòże wëzwëskac do nôùczi kaszëbsczich słowów a cyfrów. Tómk Fópka pòkôzôł przëstãpny a téż szpòrtowny ôrt nôùczi wëmòwë kaszëbsczich zwãków, z jaczima colemało nawetka dozdrzeniałi mają wiôldżi jiwer. Jak interpretowac wiérztë wiôldżich kaszëbsczich pisarzów a je wëzwëskiwac, më poznalë dzãka wëkładowi Grégòra Schramczi. Na kùńc na binã pòwanożëła Paùlëna Gerszewskô, chtërna dokazała, że za pòmòcą kreatiwnégò twòrzeniô historie z òbrôzków bez szkòlôków mòże wzbògacywac kaszëbską słowiznã.
Szkólny jak wiedno òtrzimalë òd Kaszëbskò-Pòmòrsczégò Zrzeszeniô darmòwé pùblikacje, jaczé mògą wëzwëskac òb czas ùczbów kaszëbsczégò jãzëka. Mómë nôdzejã, że wiédzô a nowé spòsobnoscë ju niedługò òstóną ùżëté òb czas zajmów w szkòłach, a jich cësk mdze widzec w lëczbie szkòlôków ùczącëch sã kaszëbsczégò jãzëka a téż w niwiznie kònkùrsowëch miónków w òbrëmim Kaszëb.
Kònferencjô òsta ùdëtkòwionô z dëtków Minysterstwa Bënowëch Sprôw i Administracje.
