3 łżëkwiata w gòscynnëch progach I Òglowòsztôłcącégò Liceùm z Partama Dëbeltjãzëkòwima m. Hieronima Derdowsczégò w Kartuzach òdbëło sã pòtkanié „Scygnąc miesądz. Przińdnota młodëch jich òczama. Kôrbiónczi”. Na zôczątkù wszëtczich przëwitôł wicedirektór szkòłë, Witold Wòjewódka. Pózni głos zabralë przédnik Zrzeszeniô, Jón Wërowińsczi, a téż Paùl Kòwalewsczi, nôlëżnik Zarządu Kartësczégò Krézu.
Lucyna Radzymińskô zapita ùtwórczëniã ksążczi „Scygnąc miesądz”, Karolënã Serkòwskô-Secechòwską, ò jinspiracje do pisaniô a ùdbë na titel dokazu. Białczi òpòwiedzałë téż ò wëspółrobòce przë rëchtowanim aùdiobooka w òbrëmim projektu „Akademia Kaszëbsczi Bôjczi”. Na wëstrzódkù pòjawilë sã téż szkòłownicë, szkólny, sztudérze a rodzëzna aùtorczi, jacy delë swój głos na aùdiobookù ti knéżczi nagrónym w Radiu Gduńsk. Bëła to leżnosc, żëbë jima bëlno pòdzãkòwac za tã robòtã!
W drëdzim dzélu, jaczi prowadzëła Éwelina Stefańskô, młodzëzna kôrbiła w mòderowóny, stolikòwi debace prowadzony metodą world cafe.
Témë, ò jaczich gadalë młodi, to:
1. Kaszëbsczi jãzëk w szkòle – trudnoscë
2. Kaszëbsczi w dozdrzeniałim żëcym – czë je wôrtno?
3. Wëspółrobòta midzë pòkòleniama dlô regionu
4. Kreòwanié òbrazu Kaszëbów
5. Kaszëbsczi jãzëk w òferce jinstytucjów kùlturë
6. Kaszëbsczi jãzëk terôczasno
Szkòłownicë robilë w grëpach – pół gòdzënë nad jedną témą, a pòstãpno pòł gòdzënë nad jinszim zagadnienim. Na kùńcu bëłë prezentacje brzadu kôrbiónków. Co cekawé szkólny bez ten czas téż robilë nad wszëtczima témama i òb czas prezentacjów gadalë ò swòjim pòzdrzatkù na te sprawë.
Jesmë baro bùszny z aktiwnoscë młodëch lëdzy, jaczé dzyrskò rzeklë, jaczé są jich pòzdrzatczi. I mùszimë pòwiedzec, że tã bùchã bëło téż widzëc w òczach jich szkólnëch! Gadôjmë z młodima – ò Kaszëbach i pò kaszëbskù!
Dzãkùjemë baro:
– direktórce szkòłë, Justinie Juńsczi-Nacel,
– Kartësczi Kréz, a apartno nôlëżnikòwi zarządu, Paùlowi Kòwalewsczémù,
– najim mòderatoróm – Katarzënie Czedrowsczi-Zagòzdón, Jiwònie Makùrôt, Tatianie Slowi, Mónice Kapiszce, Marce Majewsczi, dr. Michałowi Kargùlowi i dr. Darkòwi Majkòwsczémù,
– wszëtczim szkòłownikom a szkólnym, jaczé przëjechalë na naje wëdarzenié! (I LO w Kartuzach, I LO w Bëtowie, ZSP w Bëtowie, KLO w Brusach, I LO w Kòscérznie, PZS w Kłanianie, PZS w Przedkòwie, Chrzescëjańsczé LO we Gduńskù)
Dzejanié kòòrdinowałë Lucyna Radzymińskô i Éwelina Stefańskô.