Dwie grëpë: jedna, jakô zaczinô swòjã przigòdã z kaszëbsczim jãzëkã, i drëgô, z bëtnikama ju na zaawansowóny niwiznie znajomòscë rodny mòwë Kaszëbów – mdą bez 50 gòdzënów gadac na rozmajité témë pòd òkã i ùchã szkólny kaszëbsczégò jãzëka, Anë Cupë. W kôrbiónkach bierzą ùdzél nadzwëkòwi lëdze. Dwie òsobë mieszkają w Niemcach, sztërë są z Warszawë, jedna je z Pòznania, jedna ze Słëpska, jedna z Krakòwa, pôrã lëdzy to gduńczanie, ale są téż bëtnicë z Kòscérznë, Strzebielëna i Chwaszczëna. W wikszim dzélu òni abò jich familie pòchôdają z Kaszëb. Na przikłôd Martin z Berlëna – co sã naùcził kaszëbsczégò òd tatka i starka – przez slédné 6 lat nie gôdôł pò kaszëbskù, a kôrbiónczi ònline są dlô niegò bëlną leżnoscą do gôdaniô. Ale téż są taczi lëdze, jaczi sami sã ùczëlë i naùczëlë kaszëbiznë. Jak na przikłôd Tómk z Warszawë – ùcził sã blós z ksążków i nagraniów. A terô, z czegò je baro rôd, mô leżnosc gadac pò kaszëbsku w wikszi grëpie.
Projecht òstôł przërëchtowóny dzãka ùdëtkòwieniu Minysterstwa Bënowëch Sprôw i Administracje.
