Rôczimë do òbzéraniô relacje z latosëch regionalnëch warkòwniów „Remusowa Kara”, jaczé òdbiwałë sã w dniach 6–9 smùtana w Jurace.
Òrganizatorama wëdarzeniô bëlë nôleżnikòwie a nôleżniczczi Karna Sztudérów „Pomorania”, chtërny przërëchtowalë trój atrakcjów dlô młodëch lëdzy z kaszëbsczich strzédnëch szkòłów. Bëłë zéńdzenia z Marszôłkã Pòmòrsczégò Wòjewództwa Mieczësławã Strukã, z przédnikã KPZ, Janã Wërowińsczim, z wëszëzną jastarnicczégò samòrządu, na przódkù z bùrméstrã Bartoszã Selinã, i téż miescowégò partu KPZ, z przédniczką Martą Gwardzyk. Nie zafelowało warkòwniów jãzëkòwëch, wëkładów ò rodze półòstrowù, ò drãdżich dlô Kaszëbów wòjnowëch czasach a téż ò kaszëbsczi demònologie. Równak nôwôżniészim partã bëła, jak wiedno, integracjô młodëch z rozmajitëch nórcëków Kaszub, pòznanié sã a dzelenié swòjima doswiôdczeniama.
Pierszé warkòwnie „Remusowa Kara” klub „Pomorania” przërëchtowôł w 2006 rokù w pałacu w Starbieninie. Przédnikama sztudérsczégò karna bëlë w tim cządze Hana Makùrôt a Adóm Hintzka. Przédnym ùdbòdôwcą i òrganizatorã ti pòdjimiznë béł Łukôsz Grzãdzëcczi, jaczi napisôł projekt, dzãka chtërnémù sztudérowie dobëlë ùdëtkòwienié z Minysterstwa Bënowëch Sprôw i Administracje. Deja bëła kòntinuacją rëchlészich Zjazdów Kaszëbsczi Młodzëznë, jaczé òdbiwałë sã przez piãc lat.
Projekt òstôł ùdëtkòwiony bez Minystra Bënowëch Sprôw i Administracje.
