Chònicczé Centrum Kùlturë (CHCK) 25 i 26 rujana znowa bëło placã teatrowëch zéńdzeniów „Zdrzadniô Tespisa”. Do chònicczi placówczi scygnãlë nôleżnicë a nôleżniczczi kaszëbsczich teatrowëch karnów (w wikszoscë z Regionalnégò Dramaticznégò Teatru z Lëzëna, pòd przédnictwã Marie Krosnicczi, a Teatru Zymk, na przódkù z Adamã Héblã). Wëdarzenié òdbiwało sã w òbrëmim rëchtowónégò bez miescowi part KPZ tidzenia kaszëbskò-pòmòrsczi kùlturë.
W sobòtã kòl 40 sztëk lëdzy rëgnãło z artisticznyma warkòwniama, a jak ju naju przënãcëło karno CHCK, bëło baro czekawie a téż rozmajitozortowò. Łukôsz Sajnaj ùcził, jak pòkazëwac na binie swòje wszeczëca a òstac z nima w łączbie z drëdżim aktorã. Grégór Szlanga klarowôł, jak bëlno wëzwëskac mòżlëwòtë swòjégò głosu òbczas przedstôwkù. Pioter Rutkòwsczi zajimôł bëtników a bëtniczczi warkòwniów robòtą z tekstã, jaczi dôwô nama leżnosc do nieskùńczony lëczbë interpretacjów.
W sobòtã ò czwiôrti pò pôłnim żdała na wszëtczich prôwdzëwô teatrowô czësta – widowiszcze pòd titlã „Moby Dick”, na spòdlim amerikańsczégò romana aùtorstwa Hermana Melville’a, jaczé na chònicczi zdrzadnie przedstawił Teater Zymk. Kreatiwnota a energiô, jaką włożëło sztërzëch aktorów – Patrik Mùdlaw, Róman Hinc, Môrcën Kriża a Adóm Hébel – zawładnãła gòscama, jaczi do slédny minutë z przejãcym towarzëlë kapitanowi Ahabie i jegò załodze w mòrsczi gónie za wiôlgòrëbą.
Zgódno z tradicją teatrowëch zéńdzeniów béł téż wëkłôd prof. Daniela Kalinowsczégò z Pòmòrsczégò Ùniwersytetu w Słëpskù, chtëren klarowôł, jak wëzwëskac jak nôwicy z przedstawieniô dzãka kreatiwnoscë ùtwórców nimò mniészi lëczbë aktorów a skrómniészi scenografie.
W przińdnym rokù mdzemë miec w KPZ „Rok Różë Òstrowsczi” – pisôrczi, aktorczi a ùtwôrczczi teatrowëch scenarników. Òbczas pòsobny „Zdrzadnie Tespisa” bãdzemë chcelë òsoblëwie achtnąc patrónkã rokù, le jesz niech òstaną krëjamnotą naje ùdbë na przińdnotã. Wicy drobnotów ju niedługò!
Galeriô Òdjimków: Aleksãder Fùdali, Paùel Wiczińsczi
Projekt Teatrowé zéńdzenia “Zdrzadniô Tespisa” pòwstôł dzãka ùdëtkòwieniu Minysterstwa Bënowëch Sprôw i Administracje.
