W òbrëmim projektu „Akademiô Kaszëbsczi Bôjczi” pòwstôł aùdiobók na spòdlim dokazu Izabellë Trojanowsczi „Zómkòwô Góra”.
Dzãka wespółrobòce Kaszëbskò-Pòmòrsczégò Zrzeszeniô z Radiã Gduńsk, jaką prowadzymë òd zôczątkù tegò projektu (2011), pòwstôł pòsobny bôjkòwi ùsôdzk dlô dzecy. Jak wiedno KPZ mògło rechòwac na bëlnégò szpecjalistã z gduńsczi rozgłosnie, Jacka Pùchalsczégò. Do te doszła snôżô mùzyka, za jaką òdpòwiedzalny béł Tomôsz Perz. Je wiedzec, że wszëtkò to bë nie bëło mòżebné bez robòtë lektorów. W ti rolë pëszno wëstąpiłë m.jin. szkólny kaszëbsczégò jãzëka z Lëpińc, Szlachecczégò Brzezna a Czôrny Dąbrówczi. W nagraniach ùdzél wzãlë: Zuzana Gliszczińskô, Éwa Swiątk-Brzezyńskô, Stanisława Bastian Brzezyńskô, Ana Gliszczińskô, Bògdón Rimón [Rymon] Lipińsczi a Emiliô Spiczak Brzezyńskô. W tim rokù bôjczi mdą pierszi rôz zapisóné na pendrajwie w snôżim òbleczënkù ùsôdzonym z malënków Aleksãdrë Gliszczińsczi.
Dokôz òpòwiôdô ò przigòdach młodégò człowieka, Rôdka, chtëren spãdzywô latné ferie ù starków na Kaszëbach. Nen czekawi swiata knôp wanożi pò kaszëbsczich lasach ze swòjim tuszkã, Miszą, i pòtikô krosniã, co mô na miono Swiãtobór. Dzãka ti znajemnoce pòznôwô historiã Kaszëb a nôczekawszé kaszëbsczé legendë, m.jin. pòwiôstkã ò zapadłim zómkù a spiącym wòjskù.
Izabella Trojanowskô (1929–1995) bëła gazétniczką i pisôrką, w cządze 1980–1983 (pierszą) przédniczką Kaszëbskò-Pòmòrsczégò Zrzeszeniô. Bëła aùtórką wiele pùblikacjów sparłączonëch z Pòmòrzim – òsoblëwie z Kaszëbama i Gduńskã, wëspółaùtórką (razã z Różą Òstrowską) „Bedekera kaszubskiego”, dolmaczérką kaszëbskòjãzëkòwi lëteraturë na pòlsczi jãzëk.
Projekt “Akademia Bajki Kaszubskiej 2025” jest realizowany dzięki dotacji Ministerstwa Spraw Wewnętrznych i Administracji.
