W miono Kaszëbskò-Pòmòrsczégò Zrzeszeniô i Radzëznë Kaszëbsczégò Jãzëka mómë wiôlgą érã rôczëc Wastwò na ùroczësté zéńdzenié z leżnoscë 20-lecégò dzejaniô Radzëznë Kaszëbsczégò Jãzëka, zatitlowóné Badérowania, historiô, lëdze.
Jubileùsz dwadzescelecégò je òsoblëwim wëdarzenim w dzejach kaszëbsczi rësznotë. Je spòsobnoscą do pòdrechòwaniô dwùch dekadów dzejaniô Radzëznë, ji wkładu w rozwij i chrónienié kaszëbsczégò jãzëka, a téż do przëbôczeniô lëdzy, jaczich wiédzô, zaangażowanié i robòta przëczëniłë sã do sztôłtowaniô terôczasny kaszëbiznë.
Zéńdzenié bãdze téż rëmią do namëszlënkù nad môlã kaszëbsczégò jãzëka w dzysdniowi jawernoce i nad wëzwaniama zrzeszonyma z chrónienim gò, rewitalizacją i przińdnotą. Jesmë dbë, że bëtnictwò przedstôwców strzodowiszczów nôùkòwëch, samòrządzënowëch wëszëznów, institucjów kùlturë i pòùczënë, a téż lëdzy zaangażowónëch w żëcé kaszëbsczi spòlëznë nadô temù jubileùszowi òsoblëwą rangã.
W programie wëdarzeniô nalazłë sã m.jin. wëstąpienié Danutë Pioch pòswiãconé dwadzescelecémù dzejaniô Radzëznë, jubileùszowé wëłożënczi prof. Tomasza Wicherkewicza i prof. Nicole Dołowi, panelowô diskùsjô Chrónienié kaszëbsczégò jãzëka – midzë juwernotą, rewitalizacją a jãzëkòwą pòlitiką, a téż kòncert karna Drëszë i pòspólnô czesta.
Ùroczëzna bãdze mia môl 26 séwnika 2026 r. ò gòdz. 10.00 w aùlë m. Bògùsława Kreje na Filologicznym Wëdzélu Gduńsczégò Ùniwersytetu, sz. Wita Stwòsza 55 w Gduńskù (aùla 1.43).